8 խորհուրդ գրագետ կոմերցիոն առաջարկ ներկայացնելու վերաբերյալ

Կոմերցիոն առաջարկի շնորհիվ դուք պատվիրատուին պատմում եք ձեր մասին ու ասում, թե ինչպես եք կարող լուծել նրա խնդիրները: Ինչպես բիզնեսի ասպարեզում ցանկացած  փաստաթուղթ, կոմերցիոն առաջարկը ևս ունի կազմման հստակ սահմանված չափանիշներ, բայց գոյություն ունեն աշխատանքային գործընթացում ի հայտ եկած խորհուրդներ, որոնց կիրառումը կօգնի ավելի հստակ ու հասկանալի առաջարկ կազմել պատվիրատուների համար:

1. Պետք է պատվիրատուին ճանաչել

Առաջարկ ներկայացնող կազմակերպությունը պետք է ճանաչի պատվիրատուի ցանկությունները, նրան հանդիպող խնդիրները, նրա նպատակները:  Երբեք պետք չէ դադարել հետադարձ կապ հաստատել պատվիրատուի հետ անգամ նախագծի ավարտից հետո, քանի որ դա թույլ կտա յուրաքանչյուր առաջարկը նախորդից ավելի լավը դարձնել:

2. Ընտրել կոմերցիոն առաջարկի ձևաչափ, որն առավելագույնս հարմար կլինի պատվիրատուին

Բնականաբար, այստեղ ևս բովանդակությունը ձևից կարևոր է, սակայն եթե առաջարկը դժվար ընկալելի է, նույնիսկ ամենաշահավետ ու գրավիչ տարբերակն էլ կարող է մնալ առանց որևէ ուշադրության:

Համոզվա՛ծ եղեք, որ բոլոր նկարները, սխեմաները, վերնագրերն ու մյուս տարրերը պահպանումից հետո տեխնիկական պատճառներով չեն տեղափոխվում կամ խախտվում: Այս առումով  .docx ֆորմատի փաստաթղթերն ու .pptx պրեզենտացիաներն այնքան էլ վստահելի չեն, քանի որ կախված են ծրագրի տարբերակից, որը հաճախ տարբեր օգտատերերի մոտ չի համընկնում:

3. Հիմնվե՛ք փաստերի վրա

Պոտենցիալ հաճախորդին ցու՛յց տվեք նախորդ փորձերը, ավարտված նախագծերը, հաճախորդների կարծիքները, ձեր սերտիֆիկատները: Թվերը բոլորի համար էլ ամենահստակ ու ծանրակշիռ ապացույցն են, ուստի կարող եք նրանց ներկայացնել նաև որոշ վիճակագրական տվյալներ, օրինակ՝ ինչ է եղել նախկինում և ինչ եք ստացել դրանից: Որքան հետաքրքիր լինի ձեր անցյալը, այնքան մեծ կլինի հավանականությունը, որ հաճախորդը ձեզ կընտրի:

4. Եղե՛ք հստակ

Կոմերցիոն առաջարկը պետք է հնարավորինս մանրաման, բայց ոչ երբեք՝ ձանձրալի լինի հաճախորդների համար: Նրանք պետք է հասկանան, որ դուք հստակ գիտեք, թե ինչ արդյունք եք ստանալու վերջում: Եթե ձեր տեքստում անորոշություն կամ մշուշոտ մտքեր լինեն, միանգամից հաճախորդի մոտ անվստահություն կառաջանա:

5. Անձնավորումը հաջողության գրավական է

Հաճախորդները հաճախ նույնիսկ վիրավորվում են, երբ ստանում են ստանդարտ վաճառող առաջարկներ, որը միանգամից ուղարկվում է տասնյակ հաճախորդների: Պետք է մարդուն դիմել անձնապես՝ անուն, ազգանուն տարբերակով: Առաջարկից նա պետք է հասկանա, որ այն կազմվել է կոնկրետ իր համար և բխում է իր մոտ առաջացած խնդրիք՝ առաջարկելով լուծումը: Օրինակներ բերելիս պետք է խոսել միայն նրանց մասին, որոնքկոնկրետ նրա խնդրին են վերաբերվում: Հաճախորդն իրեն նշանակալի և ունիկալ պետք է զգա:

 

6. Ուշադրություն տեքստին

Կետադրական նշանները, իմաստ չարտահայտող ավելորդ բառերը, ոչ բոլոր համակարգիչներում երևացող սիմվոլները պետք է վերացվեն առաջարկից: Այն պետք է լակոնիկ լինի: Փորձե՛ք մեկ միտքը տեղավորել մեկ նախադասության մեջ՝ խուսափելով բարդ, խճճված մտքերից: Մասնագիտական տերմինաբանության կիրառման դեպքում անպայման գրե՛ք նաև բացատրությունը, բացե՛ք հապավումները:

7. Եղե՛ք իրազեկված

Հետևե՛ք ձեր մրցակիցներին: Տեսեք՝ ինչն է նրանց մոտ լավ ստացվում, ինչը՝ ոչ: Մտածե՛ք եղանակներ նրանց սխալները չկրկնելու և նրանց գերազանցելու համար:

8. Սովորե՛ք ձեր սեփական փորձից

Հազարավոր հոդվածներ ու հոլովակներ կան ճիշտ առաջարկի կազմման մասին, սակայն միայն փորձն է մարդուն դարձնում ավելի բանիմաց: Շատ անգամներ փորձելով, նորամուծություններ անելով ու կատարելագործվելով  է միայն հնարավոր հասնել լավագույն արդյունքների:

Իսկ եթե հետաքրքված եք ինտերնետ-մարքեթինգով, ապա սեղմելով այս հղմանը՝ կկարողանաք ծանոթանալ նաև այս տարվա թրենդների մասին մեր բլոգին: