Մարքեթինգային պլանը և դրա տեսակները

Մարքեթինգային պլանի նպատակը մարքեթինգային բոլոր միջոցառումների, դրանց արդյունքների հաշվարկման և վերահսկման համախմբումն է մեկ տեղում: Իսկ ի՞նչ արդյունքներ է տալիս մարքեթինգային պլանի գործարկումը. 

Ունենում եք վաճառքների ծավալների և սպասվող շահույթի վերաբերյալ կանխատեսումներ: Արդյունքում կարողանում եք կայացնել հիմնավորված որոշումներ ընկերությանը վերաբերող այնպիսի հարցերի վերաբերյալ, ինչպիսիք են  աշխատավարձային ֆոնդը, անշարժ գույքում և տեխնիկական սարքավորումներում արվող ներդրումները,  գնումների ծավալը: 

Մարքեթինգի թիմի աշխատանքը դարձնում եք ավելի չափելի և թափանցիկ: Պլանավորումը կատարվում է ըստ ժամկետների, կատարողների, բյուջեների, և ղեկավարն էլ հասկանում է՝ ինչով են զբաղված մասնագետները և ինչ  արդյունք են գրանցել: 

Կարողանում եք գտնել աճման կետերն ու թույլ տեղերը: Դա օգնում է առաջատար դիրքեր զբաղեցնել մրցակիցների համեմատ և մշակել ռազմավարություն, որը հաշվի է առնում սերվիսի, արտադրանքի և ընկերության համբավի բոլոր առանձնահատկությունները:

Իսկ ի՞նչ տեսակի մարքեթինգային պլաններ կան, քննարկենք մի քանիսը.

4P+4W

Պլանը հիմնված է մարքեթինգի 4P և բիզնեսի 4W կոնցեպտի վրա:

• 4P — Product + Place + Promotion + Price

Ի՞նչ ապրանք է, որտե՞ղ  է վաճառվում, ի՞նչ եղանակներով և ի՞նչ արժեք ունի:

Հետագայում մոդելին ավելացել է ևս 2P՝ People և  Physical Evidence (իրականում ավելացած P-երի թիվն ավելին է՝ կախված տեսաբանների տեսակետից, սակայն առանձնացվել են հիմնականները): Առաջինը մարդիկ են, որոնք ազդում են պրոդուկտի վրա, իսկ երկրորդը նրանց շրջապատող ֆիզիկական միջավայրը գնում իրականացնելու պահին: 

• 4W — What + When + Who + Why

Ի՞նչ եք պատրաստվում արտադրել և ե՞րբ, ո՞վ է թիրախային լսարանը և ինչո՞ւ է նա ընտրություն կատարելու հենց Ձեր օգտին: 

Հարկավոր է համադրել 4P-երը և ներկայացնել դրանք 4W պարամետրերով:

• Պրոդուկտ — ի՞նչ պրոդուկտ է, ե՞րբ է շուկա դուրս գալու, ո՞վ է գնելու այն և ինչու՞:
• Գին – որքա՞ն է պրոդուկտի գինը, որքա՞ն է պահպանվելու այդ գինը, տարբե՞ր է արդյոք գինը տարբեր գնորդների համար, ինչո՞ւ է հենց այդ արժեքն ընտրվել:
• Վաճառակետեր – ի՞նչ տեղերում է վաճառվելու արտադրանքը, ինչու՞ են  գնորդներն ընտրելու հենց այդ վայրը:
• Առաջխաղացում — ի՞նչ տեսակի գովազդ է պետք ընտրել, ե՞րբ գործարկել և ավարտել, ինչպե՞ս կարգավորել գովազդն ըստ տարբեր սեգմենտների:

SOSTAC

SOSTAC — ը հապավում է, որտեղ

• Situation Analysis — բիզնեսի ընթացիկ իրավիճակն է՝ ունիկալ առաջարկ,  մրցակցային առավելություններ, ռեսուրսներ, սպառման ուղիներ, շահույթ, հաճախորդներ:
• Objectives — նպատակներ, որոնց ձգտում է հասնել ընկերությունը. օրինակ՝ կես տարում մեծացնել վաճառքի ծավալները 15%-ով:
• Strategy — նպատակներին հասնելու ռազմավարությունը: Վերցնում ենք նպատակը և բաժանում դրանք խնդիրների: Օրինակ՝ խնդիրն է մեծացնել հաճախորդների LTV-ն 1 տարվա ընթացքում: Խնդիրը՝ պատրաստել հարցաթերթիկներ հաճախորդների հետազոտության համար, ուղարկել դրանք,  վերլուծել արդյունքները և ըստ դրա կազմել խորհրդատվություն:
• Tactics — մարտավարություն. օրինակ՝ ինտերնետ մարքեթինգում մարտավարության գործիքակազմի մեջ մտնում են  նամակների մասսայական ուղարկման, կայքերի վերլուծության, լսարանի թիրախավորման և մի շարք այլ գործիքներ:
• Action — գործողություններ՝ ուղղված նպատակին քայլ առ քայլ հասնելուն՝ գրաֆիկ, բյուջե, կատարողներ, ժամկետներ: Օրինակ՝ լսարանին «տաքացնող» գովազդի գործարկում Facebook-ում և վեբինարի անցկացում:
• Control — KPI-ների սահմանում, որոնցով գնահատվելու են իրականացված գործողությունները: Օրինակ՝ ընկերության հիշատակումը սոցցանցերում, վեբինարի մասնակիցների վերածում պրոդուկտի բաժանորդների,  email-ին բաժանորդագրված անձանց աճ և այլն:

Դասական մարքեթինգային պլան

Ներառում է տարածված, մարքեթոլոգների համար առօրյա բլոկներ մարքեթինգային  միջոցառումների պլանավորման և վերահսկման համար:

• Իրավիճակի վերլուծություն – հաճախորդներ, վաճառքներ, մրցակիցներ:
• Նպատակներ – օրինակ՝ ինտերնետ խանութի թրաֆիկի աճ 25%-ով:
• Մարտավարություն -  գործողությունների պլան՝ օրինակ՝ կոնտեքստային գովազդի գործարկում Google Ads-ով, լիդերի մագնիսի ստեղծում:
• Բյուջե – որքան է պատրաստ ընկերությունը ծախսել նպատակների իրագործման համար: Ամսական 1 500 000 դրամ կոնտեքտային գովազդի համար և 350 000 դրամ լիդերի մագնիսի գործարկման համար:
• Վերահսկում – ժամկետներ, կատարողներ, KPI-ներ:

1 էջանոց մարքեթինգային պլան

Սա մարքեթինգային պլանի կարճ տարբերակն է, որը հարմար է փոքր բիզնեսներին և ստարտափներին: Պլանը ներառում է հաճախորդի անցումը վաճառքի ձագարի փուլերով.

• Պոտենցիալ հաճախորդ – նա բրենդին ծանոթ չէ, և բիզնեսի խնդիրն է գտնել նրան ինֆորմացնելու ուղիներ և պատրաստել ռելևանտ հաղորդագրություններ:
• Լիդ – ծանոթ է բրենդի հետ, բայց ոչինչ չի գնել, և բիզնեսի խնդիրն է հասցնել հաճախորդին պրոդուկտի տված արժեքը, վստահություն վաստակել, տաքացնել և աստիճանաբար դրդել գնման:
• Գնորդ – ծանոթ է բրենդին, գնումներ կատարել է, և բիզնեսի խնդիրն է պահել նրան և մեծացնել միջին չեկը:

Իսկ ի՞նչ ժամանակահատվածի համար է կազմվում մարքեթինգային պլանը

Մարքեթինգային պլանի ժամկետներն ընտրում է ընկերությունը.

• Կարճաժամկետ – 1 ամիս
• Միջնաժամկետ  - 3 ամիս
• Երկարաժամկետ – 1 տարի և ավել

Դե ինչ, ժամանակն է գործել պլանի համաձայն, այլ ոչ թե բիզնեսն առաջ տանել՝ խարխափելով անորոշության մեջ: Իսկ թեմային ավելի խորությամբ ծանոթանալու համար չմոռանաք ընթերցել ևս մեկ նյութ՝ «Մարքեթինգային ռազմավարություն: Մշակման 6 պարզեցված քայլերը»: