12 քայլ, որ ոչնչացնում են բրենդը: Սեթ Գոդին

Կան քայլեր, որոնք, հնարավոր է, ձեռնարկատիրոջը կարճ ժամանակահատվածում եկամուտներ բերեն, բայց դրանք հաճախորդների կողմից վաղ թե ուշ բացահայտվում են, և նրանք, հասկանալով, որ իրանց հետ ազնիվ չեք վարվել, միանգամից հեռանում են: Վստահ եղեք, որ միայն նրանց հեռանալով խնդիրը չի փակվում, քանի որ դժգոհ հաճախորդն այդ մասին անպայման տեղյակ է պահում իր ծանոթներին:

Այս թեմային է անդրադարձել ամերիկացի հայտնի ձեռնարկատեր, բիզնես-բեսթսելլերների հեղինակ և մարքեթինգային բլոգեր Սեթ Գոդինը:

Նա առանձնացրել է մի քանի քայլ, որոնք անելով՝ դուք ստիպում եք հաճախորդներին իրենց հիմար զգալ.
— Ունենալով խանութների ցանց՝ նույն ապրանքների վրա դնում եք տարբեր գներ՝ հուսալով, որ մարդիկ չեն նկատի: Սակայն երբ վաղ թե ուշ դա բացահայտվում է, ստիպված եք լինում թափ տալ ուսերը և ստել, իբրև տեղյակ չէիք կամ էլ հորինել արդարացումներ: Հետևություն. մարդկանց համար ավելի նախընտրելի է բոլոր տեղերում տեսնել թանկ արժեքը, քան մի տեղում թանկը, մյուսում՝ էժանը:
— Պնդել, որ երաշխիքը ավարտվում է ուղիղ հայտարարված օրը, և երբ թանկարժեք ապրանքը փչանում է հայտարարվածի անգամ հաջորդ օրը, ձեռքերը լվանալ և հրաժարվել որևէ տեսակի երաշխիքային սպարասկումից: Ի՞նչ կզգայիք, եթե նույնը պատահեր Ձեզ հետ, խնդիրը դիտարկե՛ք նաև այդ տեսանկյունից:
— Նոր հաճախորդներին շատերն են ակցիաներ ու զեղչեր խոստանում, իսկ հավատարիմ հաճախորդները մնում են անտեսված: Լինում է, որ մեզ մոտ էլ, օրինակ, բջջային կապի փաթեթի համար նոր հաճախորդների հետ պայմանագիր է կնքվում ընդմիշտ կես գին վճարելու պայմանով, իսկ հին հաճախորդները ամիսներ շարունակ վճարում են հին գինը: Արդարացի՞ է արդյոք սա, քանի որ երբ հին հաճախորդը դիմի, ստիպված եք լինելու արդարանալ:
— Զգալի թանկ գնով վաճառել ապրանքը, որն իր  հատկություններով անգամ ավելի թույլ ու անհուսալի է, քան մատչելին՝ հույսը դնելով այն բանի վրա, որ մարդիկ կնախընտրեն գնել թանկը՝ վստահաբար կարծելով, թե ավելի լավ ապրանք են ձեռք բերում: Մեկ անգամ նրանք կվճարեն, իսկ հետո նրանք մտածելու են այսպես. եթե թանկ ապրանքը սա է, ապա ինչպիսի՞ն է լինելու էժանը:
— Վաճառել հաճախորդին ապրանք, ծառայություն կամ գաղափար՝ նախապես վստահ իմանալով, որ դրա համար նրա վրա ծիծաղալու են: 
Հաճախ է լինում, որ արտադրողը, քաջ գիտակցելով իր պրոդուկտի արժանիքները, անիրական ճոխ ձևով դա ներկայացնում է հաճախորդին՝ կորզելով գումար: Իսկ հետո, երբ բոլորը գնորդին վսստահեցնում են, որ ինքը խաբված է կամ անիմաստ գնում է կատարել, արդյո՞ք սա համբավ է բերելու վաճառողին:
— Գաղտնիք չէ, որ ընկերությունները մեկը մյուսից  գնում են հաճախորդների անձնական տվյալները: Պատկերացրեք՝ որքան տհաճ կլինի հաճախորդին իմանալ, որ դուք առանց նրանց իմացության այլ ընկերության եք վաճառել նրանց տվյալները: 
— Պայմանագրերի ու համաձայնագրերի ամենակարևորդ կետերը հաճախ գրվում են շատ մանր տառերով և գրեթե անտեսանելի են լինում: Եթե մտածում եք՝ հաճախորդի համար այդ տեղեկատվությունը կարող է առանցքային նշանակություն ունենալ, երբեք մի՛ մանրացրեք տառերը, դա նրա մոտ տհաճ նստվածք է թողնելու:
— Այս կետն ավելի շատ վերաբերում է գործընկերային հարաբերություններին: Երբեք գումար հավաքելիս մի՛ ընդունեք այնպիսի կեցվածք, իբրև այդ համագործակցությունը շարունակվելու է երկար ժամանակ, եթե մնացած այլ հարցերում Ձեզ այնպես եք պահելու, կարծես փոխհարաբերությունները կարճաժամկետ են ու եթե ավարտեն, դա Ձեզ համար ոչինչ չի նշանակի:
— Գործընկերների, հաճախորդների ու աշխատակիցների մասին նրանց մեջքի հետևում երբեք մի՛ արտահայտվեք այնպես, ինչպես չէիք խոսի դեմ դիմաց կանգնած:
— Կտրուկ գնիջեցումից հետո ոչինչ չասել մարդկանց, ովքեր նոր են գնել ապրանքը բարձր գնով: Իրականում գուցե քչերը դիմեն, որ զեղչից հետո գումարը վերադարձնեք, սակայն դրան միշտ պետք է պատրաստ լինեք:
— Միևնույն հարցին 2 անգամ պատասխանելուց հետո 3-րդ հարցը տվողին կոպտել: Սա բացառվում է թե՛ գործընկերների, թե՛ հաճախորդների հետ հարաբերություններում:
— Երբ ցանկանում եք որոշում կայացնել՝ հիմնվելով հաճախորդի միտումների, վարքի, ինտելեկտի և փորձի վրա, երբեք մի՛ թերագնահատեք նրան ու դիտարկեք վատագույն տարբերակը:

Միշտ հիշե՛ք՝ մարդիկ ընդհանրապես դեմ չեն ավել գումար վճարել, եթե հստակ գիտեն՝ ինչի դիմաց է դա: Նրանք ցանկանում են ստանալ ազնվություն, քաղաքակիրթ վերաբերմունք, վստահության զգացում: 
Եթե ընթերցեցիր այս հոդվածը մինչև վերջ, ապա հավանաբար հետաքրքրված ես բիզնեսով, ուստի խորհուրդ ենք տալիս ընթերցել մեկ այլ բլոգ Z սերնդի մասին. Սերունդ, որը արդեն իսկ որոշիչ դեր ունի բիզնես աշխարհի զարգացման ուղղության վրա: