Բրենդի ռազմավարություններ ստարտափների համար

 

Ստարտափի հիմնումը բազմաթիվ մարտահրավերներ ունի, որոնք պետք է հաղթահարվեն: Վաղ փուլում գործադիր տնօրենների համար հիմնական մտահոգությունները սովորաբար պտտվում են արտադրանքի մշակման և ֆինանսավորման ապահովման շուրջ: Այնուամենայնիվ, շատերը չեն կարողանում գիտակցել ապրանքանիշի կառուցման կարևորությունը՝ հաճախ այն մղելով երկրորդ պլան։  

Ապրանքանիշի ստեղծումը նույնքան կարևոր է վաղ հաջողության համար, որքան արտադրանքի մշակումն ու ֆինանսավորումը:  

 

Փոքր երեխայի համախտանիշ

 

Ստարտափները հաճախ պայքարում են, որպեսզի իրենց արտադրանքի կամ ծառայության նորարարությունները ընկալելի լինեն ներդրողների և պոտենցիալ հաճախորդների կողմից: Սկզբում հիմնադիրները հակված են հավատալու, որ բոլորն անմիջապես կհասկանան իրենց գաղափարների նշանակությունը: Հետևաբար, նրանց ուղերձները սկզբնական փուլում հաճախ ձախողվում են:

Ինչպես նորածնի մոտ, որ նոր է սովորում քայլել, այնպես էլ ստարտափների մոտ սայթաքելը և բազմիցս վեր կենալը զարգացման մի մասն են կազմում: Այնուամենայնիվ, վենչուրային կապիտալի գործարքների արագ տեմպերը ներողամիտ չեն ստարտափների հիմնադիրների նկատմամբ, ովքեր չեն կարողանում արդյունավետորեն ներկայացնել, թե ինչու է իրենց նորարարությունը կարևոր որևէ մեկի համար։  

Ստարտափի հիմնադիրները պետք է պարզաբանեն, թե ինչու է իրենց գաղափարն ու առաջարկը կարևոր մարդկանց որոշակի խմբի համար:  

 

Ի՞նչն է առանձնացնում ձեր ստարտափը

 

Շուկան լցված է անթիվ բիզնեսներով, հաճախ՝ միանման ապրանքներով և ծառայություններով։

Սկսնակ գործադիր տնօրենները  երկար ժամեր, օրեր, շաբաթներ և տարիներ են ներդնում իրենց բիզնեսում: Պետք է հիշել, որ բրենդի ռազմավարությունը նույնպես բիզնեսի վրա աշխատելու գործընթաց է: Կայուն բրենդի կառուցման առաջին քայլը վստահություն ձեռք բերելն է։

Հիմնադիրները պետք է բացահայտեն և հիմնավորեն, թե ինչն է դարձնում իրենց նորարարությունը անհրաժեշտ և տարբերվող: Մի աշխարհում, որտեղ ապրանքայնացումն աճում է, համապատասխան տարբերակումը դառնում է ապրանքանիշի հաջողության բանաձևը։

Լինել տարբերվող՝ նշանակում է առաջարկել արևէ բան, որը շատ է փնտրում հստակ սահմանված թիրախային հաճախորդը, և որը հեշտությամբ չի գտնվի որևէ այլ տեղ: Երբ հիմնադիրը կարողանա հստակ սահմանել այն սեփական բիզնեսի համար, կկարողանա նաև վայելել ոլորտում մրցակցային առավելությունը։  

 

Ապրանքանիշի ռազմավարությունը մարքեթինգ չէ

 

Ստարտափների գործադիր տնօրենների շրջանում տարածված սխալ պատկերացումներից մեկն այն է, որ ապրանքանիշի ստեղծումը զուտ մարքեթինգային գործունեություն է: Իրականում ապրանքանիշի ռազմավարությունը և մարքեթինգը երկու առանձին, բայց փոխկապակցված երևույթներ են: Ապրանքանիշի ռազմավարությունը ներառում է շուկային առաջարկվող արժեքի հիմնական էության ըմբռնումը և սահմանումը, մինչդեռ մարքեթինգը կենտրոնանում է տարբեր հաղորդակցման ուղիներով արժեքի արտահայտման և  ուղերձների փոխանցման վրա։

Ապրանքանիշի ռազմավարությունը պահանջում է իրական մարքեթինգային պատկերացումներ և ստեղծագործական մտածողություն, մինչդեռ մարքեթինգը պահանջում է ֆինանսական ռեսուրսներ: Մարքեթինգը միշտ պետք է հետևի հստակ սահմանված բրենդի ռազմավարությանը, այլ ոչ թե հակառակը:

 

Բրենդինգը սկսվում է նեյմինգից՝ բրենդի համար հիշարժան անուն ընտրելուց

 

Երբ ստարտափը ժամանակի ընթացքում աճում է, այն ձեռք է բերում հավատարիմ հաճախորդներ, ստեղծում վստահելի հարաբերություններ և զարգացնում համբավ, որը վերածվում է ավելի մեծ ֆինանսական արժեքի: Այս ամենին կարելի է հասնել ավելի արդյունավետ ճանապարհով՝ ընտրելով ուժեղ, հիշարժան անուն, որը հիմք է կհանդիսանա ձեր ապրանքանիշի հեղինակության համար: Անունը ձեր առաջարկի մասին երբևէ պատմված առաջին պատմությունն է։ 

Ճիշտ անուն ընտրելը ժամանակ և կրեատիվություն է պահանջում, բայց դա կարևոր քայլ է ապրանքանիշի ուժեղ ներկայություն հաստատելու համար։

Բրենդը այն բոլոր փորձառությունների հանրագումարն է, որը հաճախորդը ստացել է բրենդի հետ հաղորդակցման միջոցով: Ուժեղ և կայուն ստարտափ ապրանքանիշերը հասկանում են դա և ապահովում են այդ բոլոր երեք բաղադրիչները։

Ապրանքանիշի ինքնություն. սա ներառում է ապրանքանիշի հիմնական էությունը և այն, թե ինչպես է այն ռեզոնանսվում հաճախորդների հետ: Այն ներկայացված է խորհրդանիշներով, լեզվով և կազմակերպության մշակույթով և/կամ ժառանգությամբ: Օրինակ՝ Apple-ի ապրանքանիշի ինքնությունը հոմանիշ է նորարարությանը, պարզությանը և էլեգանտությանը:

Ապրանքանիշի խոստում. սա վերաբերում է այն օգուտին, որն ապրանքանիշը բերում է հաճախորդներին: Ծառայության և արտադրանքի վերաբերյալ ասոցացիաները հիմնված են ֆունկցիոնալ, փորձառական և զգացմունքային օգուտների վրա, որոնք հաճախորդները ստանում են ապրանքանիշից: Օրինակ, Airbnb-ն խոստանում է եզակի ճանապարհորդական փորձառություններ, որոնք ավելին են քան բոլորին ծանոթ կացարանները, կամ հյուրատները։  

Ապրանքանիշի փորձ. սա ներկայացնում է շոշափելի փոխազդեցությունն ու գործարքը, որը հաճախորդներն ունենում են ապրանքանիշի հետ: Այն արտացոլում է այն, թե ինչպես է բրենդը կատարում իր տված խոստումը: Այս ասոցիացիաները ձևավորվում են արտադրանքի, մարդկանց և վայրերի հետ իրական շփումների միջոցով: Օրինակ, Tesla-ն ապահովում է էլեկտրական մեքենաների անխափան  վարելու փորձ, ինչպես նաև ասոցացվում լիցքավորման կայանների ցանցի հետ:

Այս երեք բաղադրիչները հենց սկզբից կազմում են կայուն ապրանքանիշի հիմքը: Նրանք պետք է դետալային նախագծվեն և համապատասխանեցվեն թիրախային լսարանի նախասիրություններին, որի շնորհիվ էլ կապահովվի հաջողությունը։