Facebook-ում արգելվում է կորոնավիրուսի հետ կապված որոշ ապրանքների գովազդումը
Անգամ ոլորտից անտեղյակ մարդիկ հասկացան, թե ինչպես վիրուսի տարածմանը զուգընթաց սկսեցին կտրուկ բարձրանալ դիմակների, ախտահանիչների, ալկոգելի գները: Facebook-ն, իր հերթին, որոշեց հակազդել առիթից օգտվողներին՝ արգելելով մի շարք ապրանքատեսակների գովազդումը, որոնք անհրաժեշտ են կորոնավիրուսից պաշտպանվելու համար: Արգելքը վերաբերում է հետևյալ ապրանքատեսակներին՝
• Ձեռքերն ախտահանելու միջոցներ,
• Մակերևույթներն ախտահանելու միջոցներ,
• COVID-19-ը թեստավորելու միջոցներ,
• Արգելքը դիմակների վրա արդեն իսկ գործում է
Արգելելով տվյալ ապրանքատեսակների գովազդումը՝ Ֆեյսբուքը փորձում է պաշտպանել օգտատերերին արհեստականորեն ուռճացված գներից: Եթե հարթակը նկատի այս ապրանքատեսակների հետ կապված չարաշահումներ անգամ օրգանական հրապարակումներում, այսպիսի կոնտենտը ևս կջնջվի անգամ առանց գովազդի միացման:
Հայտարարության բնօրինակը կարող եք տեսնել նկարում՝
Բացի դրանից, Ֆեյսբուքը տեղեկացնում է, որ արդեն իսկ այս շաբաթվանից սկսած՝ մեծ թվով ստուգումներ կսկսեն իրականացվել ավտոմատացված ռեժիմով: Գովազդատուների համար դա կարող է ունենալ հետևյալ հետևանքները՝
• Գովազդի ստուգման ժամանակահատվածի երկարաձգում,
• Դիմուների պատասխանների ստացման ժամանակահատվածի երկարաձգում,
• Մերժված հայտարարությունների թվի կտրուկ աճ. սա ենթադրում է, որ կաճեն նաև սխալմամբ մերժված գովազդները:
Սոցկայքը խորհուրդ է տալիս գովազդատուներին դեռևս չստեղծել նոր հայտարարություններ, այլ ընդլայնել նախորդների ցուցադրման հնարավորությունները, քանի որ հակառակ դեպքում հնարավոր չի լինի խուսափել սոցկայքում աշխատանքների խափանումներից: Պետք է նաև հնարավորինս խուսափել արդեն իսկ հաստատված հայտարարությունների խմբագրումից, քանի որ դրանից հետո հայտարարությունը կրկին անցնելու է հաստատման փուլով:
Հիշեցնենք, որ Ֆեյսբուքը խոստացել է կորոնավիրուսից տուժած փոքր բիզնեսին նվիրաբերել ընդհանուր առմամբ 100 միլիոն դոլար:
Դե ինչ, սա բոլոր նրանց համար էր, ովքեր հետաքրքրված են կորոնավիրուսով, իսկ եթե ցանկանում եք ցրվել, խորհուրդ ենք տալիս ընթերցել նաև մեկ այլ բլոգ՝ «Puma-ի նոր մոդելը պատկերում է Հիտլերի՞ն»:
