Երբ հերթական անգամ տեսնում ես «Ընկերություններ, որոնք գովազդի կարիք չունեն», «10 ընկերություններ, որոնք չեն զբաղվում մարքեթինգով» վերնագրերը, ակամա թերահավատորեն ես մոտենում, բայց, այնուամենայնիվ, հետաքրքրություն է առաջանում։ Իրականում կան բազմաթիվ միջազգային ընկերություններ, ովքեր հրաժարվել են գովազդի ավանդական տարբերակներից։ Այդ մասին կխոսենք Բրենդոնի այսօրվա բլոգում։
Մենք գիտենք, որ ընկերություններ, որոնք չեն օգտվում գովազդից, պարզապես գոյություն չունեն։ Մի կողմից, գնորդներին դուր է գալիս, երբ ընկերությունները փորձում են գոհացնել իրենց, իսկ մյուս կողմից, շուկայավարներն իրենց հերթին սիրում են մարդկանց գոհացնելու ուղիներ գտնել: Եվ եթե որոշ ընկերություններ հետևում են գովազդի ավանդական մեթոդներին, մյուսները փորձում են առանձնանալ ամբոխից և գտնել իրենց ուրույն ճանապարհը:
Մենք առանձնացրել ենք 4 ընկերություն, որոնք որոշել են անտեսել ավանդական մարքեթինգը։
Zara
Zara-ի առաջին մանրածախ խանութը բացվել է 1975 թվականին, և մինչև 2020 թվականն ընկերությունն ուներ 2000 կետ աշխարհի 77 երկրում: Zara-ն կայսրություն է կառուցել՝ շնորհիվ իր հեղինակության՝ որպես ընկերության, որն օգտագործում է տեխնոլոգիաներ և ավտոմատացում՝ վերլուծելու վերջին միտումները և մի քանի օրվա ընթացքում նորաձևությունը պոդիումներից դեպի իր խանութների դարակներ տեղափոխելու համար:
Ինչպե՞ս է Zara-ն խուսափում ավանդական մարքեթինգից: Նախ, նրանք հստակ սահմանեցին իրենց թիրախային լսարանը՝ տղամարդիկ, կանայք և երեխաներ խիտ բնակեցված քաղաքներում: Երկրորդ, պատրաստում են մատչելի նորաձև հագուստ՝ մանրուքներին մեծ ուշադրություն դարձնելով։ Եվ երրորդ, արտադրում են յուրաքանչյուր մոդելի սահմանափակ թողարկում՝ գնման հրատապության էֆեկտ ստեղծելու համար:
Zara-ն նաև տիրապետել է ազդեցիկ մարդկանց միջոցով ապրանքները գովազդելու արվեստին: Երբ Քեմբրիջի դքսուհին արքայազն Ուիլյամի հետ հարսանիքից հետո հագավ Zara-ի զգեստ, ապրանքանիշն անմիջապես ճանաչվեց ամբողջ աշխարհում։
Krispy Kreme
Երբ Դուեյն Չեմբերսին՝ Krispy Kreme-ի մարկետինգի բաժնի ղեկավարին, հարցրին, թե ինչպես են նրանք չափում ROI-ը թվային ալիքներում, հավելվածներում և սոցիալական լրատվամիջոցներում, նա պատասխանեց. «Մեր ապրանքանիշը կառուցվել է առաջարկությունների և բանավոր խոսքի վրա, և մենք շատ ռեսուրս չենք ներդրել ավանդական մարքեթինգի մեջ… Այն ամենը, ինչ հիմա անում ենք առցանց, պետք է ցույց տա, թե որքան լավ ենք մենք շփվում մեր հաճախորդների հետ»։
Հեռուստատեսությամբ գովազդի փոխարեն Krispy Kreme-ն ներդրումներ է կատարում աշխատակիցների հմտությունների զարգացման գործում։ «Խանութի յուրաքանչյուր աշխատակից մարկետոլոգ է», - բացատրում է Չեմբերսը: Krispy Kreme-ի բոլոր աշխատակիցները վերապատրաստվում են կորպորատիվ համալսարանում, որտեղ նրանց սովորեցնում են բլիթներ պատրաստել, հաճախորդներին պատշաճ սպասարկել և, իհարկե, մարքեթինգային հմտություններ:
Krispy Kreme-ն իր խանութների համար ընտրում է ակտիվ երթևեկություն ունեցող վայրեր, իսկ բլիթների արտադրության գործարանը միշտ գտնվում է մեծ պատուհանի կողքին, որպեսզի բոլորը կարողանան տեսնել պատրաստման գործընթացը: «Սա ևս մեկ միջոց է՝ կոտրելու հաճախորդների և ապրանքանիշի միջև առկա խոչընդոտները և հրավիրելու հաճախորդներին գալ և փորձել մեր արտադրանքը», - ասում է Չեմբերսը:
Sriracha
Օ՜, այդ կծու կետչուպը: Զարմանալի է, որ այս հայտնի ապրանքանիշը Pinterest-ում ընդամենը 80 հետևորդ ունի, իսկ մինչև 2014 թվականը նրանք ընդհանրապես հոգ չէին տանում կայքի մասին և ամբողջովին անտեսում էին Facebook-ը։ Այժմ Huy Fong Foods ապրանքանիշը ներկայացված է գրեթե բոլոր սոց․ ցանցերում, սակայն ընկերությունը չի շտապում ներդրումներ կատարել դրանց զարգացման մեջ։ «Ես գովազդ չեմ օգտագործում, քանի որ պարզապես չեմ կարող դա անել», - ասում է գործադիր տնօրեն Դեյվիդ Թրանը:
Նա կտրականապես հրաժարվում է գումար խնայել՝ ներմուծելով էժան չիլի պղպեղ (Սրիրաչա սոուսի ողջ չիլի պղպեղը գալիս է Լոս Անջելեսի մերձակայքում գտնվող տեղական ֆերմայից) կամ արտադրության աութսորսինգով: Նրա ընկերությունը տրամադրում է ավելի լավ որակ, ծախսերը կրճատելու փոխարեն: Մինչ սոուսը հայտնի կդառնար ամբողջ աշխարհում, այն անվճար բաժանվում էր Ասիայի խոհարարներին: Այս ռազմավարությունը գործեց. այժմ սոուսի վաճառքը գերազանցում է տարեկան 20 միլիոն շիշը: Բացի այդ՝ «Sriracha» անունը չի կարող գրանցվել որպես ապրանքային նշան, քանի որ այն Թաիլանդի շրջան է, և յուրաքանչյուրը կարող է օգտագործել այն: Բայց Դեյվիդին միայն ուրախացնում է այս իրավիճակը. իր համար դա անվճար գովազդ է։
Trader Joe's
Եթե Google-ում մուտքագրեք «Trader Joe's», կտեսնեք, որ նրանք ունեն Google+ էջ մեկ բաժանորդով: Հազարամյակի ամենահայտնի ապրանքանիշերից մեկն ընդհանրապես չունի սոցիալական մեդիայի հաշիվներ: Բայց նրանք ունեն բիզնես մոդել, որը սիրում են հաճախորդները։ Այն, ինչ առանձնացնում է Trader Joe-ին, նրանց բացառիկությունն է: Բրենդինգի պատրանքներ չկան, և տեսքը, ձայնը, հոտը և համը միավորվում են՝ ստեղծելով մի փորձ, որը եզակի է։ Այնուամենայնիվ, Trader Joe's-ն ունի մեկ մարքեթինգային գործիք՝ The Fearless Flyer-ը՝ տպագիր և առցանց տեղեկագիր՝ սրամիտ տեքստերով և բազմաթիվ զեղչերով: Flyer-ը հիմնական և, թերևս, միակ գովազդային նյութն է, որը կարելի է տեսնել սննդի խանութների այս ցանցից:
Մարքեթինգային գործիքների ընտրությունն ամենակարևոր խնդիրներից մեկն է, որ պետք է լուծվի համապատասխան մասնագետների կողմից։ Ճանաչում և վաճառքի մեծ ծավալ ապահովելու ճիշտ մեթոդների ընտրությունը զգալի նշանակություն կունենք ողջ բիզնեսի հեռանկարների համար։ Շարունակեք հետևել Brandon-ի բլոգին՝ ոլորտի ամենահետաքրքիր նորությունների մասին տեղեկանալու համար։ Շտապեք ընթերցել նաև «Ի՞նչ է դեինֆլյուենսը և ինչպիսի՞ ազդեցություն ունի» բլոգը։